අනාථ වූ බහිරවයන්ගෙන්..

ගල් තලා යට සැඟවූ

රත්රන් මුතු මැණික් කැබැලිති

රකින්නෙමු යුග ගණන්

වස්තු තෘෂ්ණාවෙන්

මඩිනා සිතැති අප..

අමනුෂ්‍ය 

ස්වභාවය එයයි..

මහ පොළොව සතු

අති මහත් නිධානය

ගහ කොළ ඇළ දොල නදී

සතා සීපාවන්මය..

එය රකිනු බැරි තොප

තෘෂ්ණාවෙන් මැඩූ සිතැතිව

අමනුෂ්‍ය රීති කඩකර

ඉල්ලයි රත්රන් කැබැලි

යුධ භටයින් එවා

බැකෝවෙන් පහර දී..

මුග්ධ මිනිසුනි තොපට

රැකිය නොහැකිය කිසිවක්

කල්ප කාලයක් හාමතින්

වැදහොත් විලස

අමනුෂ්‍යයන් ඉක්මවූ

තණ්හාධිකය තොප මන..

අවසන පැරැදී ඇත

තමා සතු හදවතින්

මිනිසුන්ට පමණක් නොව

අමනුෂ්‍යයන් ළඟද තොප..