දළඳා හිමියනි ඔබේ කැමැත්තට ඉඩ කොහෙද?

සියවස් ගණන්

රජවරුන්ගේ

ශ්‍රී විභූතිය වෙනුවෙන්

හිඳ ඔවුන් ඇසුරේ

වෙහෙසක් දැනෙනවා ඇති

දළඳා හිමියනි

ඔබට අපමණ..

ධනවත් කුළවතුන්ගේ

භුක්තියට සරිවුණ

ආඩම්බරකාර තේවාව

එපාවී ඇතැයි හොඳටම

නොසිතා ඉන්නෙ කොහොමද?

පීඩක බලවතුන්ගේ

බැල්මටම නිතර හසුවන

ඔවුන්ගේ කිළිටි හදවත්

දැක දැකම වැඩ හිඳින

ඔබට වෙහෙසක් නැතැයි

සිතන්නේ කෙලෙසද?

දුර ඇසෙන බෙර සක් හඞ

වයන මිනිසුන්ගේ

දාඩිය ගෙනෙන සුවඳට

ඈත ගොවි බිම්වල

මහ පොළොව අස්වද්දන

මිනිසුන්ගේ නොහිම්

මඩ සුවඳ ගෙනෙන සුළඟට

ආශා හිතෙනවා ඇති..

ස්වභාවික දේ අතර

ස්වභාවික හදවත් ළඟ

ළංවී හිඳින්නට

කැමැත්තෙන් ඇති ඔබ

සියවස් ගණන්

සිර කර හිඳින කල

මාළිගාවක..