Wednesday 30 June 2010

ඊළඟ අයවැය


 
                                        මේ විශාලා මහනුවර
                                        අඩපණව වැතිර නිදනා
                                        මිනිසුනි බලව් නුබ ගැබ
                                        මළාණික ඇස් හැර..

                                        මියෙන තොප සිරුරු
                                        කීතු‍ කොට බුදින්නට
                                        ලේ රතැ'ස් දිදුලන
                                        ගිජු ලිහිණියන් පැමිණෙත..

Monday 28 June 2010

මේ දෑස් කුමටද...?



                                   යක්ෂයාගේ මහඟු තිළිණය
                                   මට ලැබිණ 'දෙනෙතු' ලෙස
                                   සකලවිධ බහුරූ සොයා
                                   මගේ මනසේ ගොඩ ගසන
                                   මා මුළාවේ හෙලන...

                                   වසාගෙන නෙතු පියන්
                                   එම්බා දෑස යොමුවනු
                                   ඇතුඵ හදගැබ වෙතට
                                   එතුළ සිද්ධස්ථානයට...

                                   එහි ඇති සෞන්දර්යය
                                   මැද අසනු දැන්වත්
                                   ජීවිතේ ගයන හැටි
                                   නිහඞතාවේ ගීතය
                                   දෙවියන්ගේ මහඟු තිළිණය...

Wednesday 23 June 2010

දරුපෙම



                                     සරල රේඛා‍වක් නොවී
                                     අනන්ත පරිධියකින් යුත්
                                     වෘත්තයක් වූයේ කිමැයි
                                     කෙළවරක් නොදිස්වෙන..

Tuesday 22 June 2010

නොසිදුවීම් සිදුවීම



                                    දහස් දේ කලමුත් කලෙක
                                    කිසිවක්ම සිදු නොවිණ..

                                    එනමුත් අද
                                    කිසිවක්ම නොකර මා
                                    නිහඞතාවය ගැඹුරෙහිය..

                                    එහෙත් අරුමෙකි
                                    කෝටි සංඛ්‍යාත දේ
                                    මා තුළ සිදුවෙනු දකිමි..

Tuesday 15 June 2010

යථාවබෝධය..


                           ඇමදුවත් අලුයමෙහි මිදුලම
                           නැති ලෙසට තුරු පතක් ශේෂව
                           තිබේ හවසට පුරා එමිදුල
                           වියළි පත් තව සලා   ගහවැල...

                           ඇමදුවත් හෙට අලුයෙමේ යළි
                           වැටී තුරුපත් මිදුල සැමතැන
                           නැවත නැවතත් අපිරිසිදුවේ
                           ලොවේ පුහුදුන් සිතක් විලසට...

Friday 11 June 2010

දික්කසාදය


 
                                         සේසතම පැරැදී
                                         සිඳී ගිය හිස් අතින්
                                         නිදහසක් සිත දරා
                                         සූදුවෙන් සමුගනිමි...

Thursday 10 June 2010

සෙවැණැල්ලක සෙවණැල්ල



                                        මම සෙවැණැල්ලක්මි
                                        එනමුදු සොඳුර
                                        කුමක සෙවණැල්ලක්දැයි 
                                        නොදනිමි මමම
                                        ඉදින් ඔබ....
                                        සෙවැණැල්ල වන්නට මගේ
                                        සිතන්නේ කිමැයි තව
                                        සෙවැණැල්ලක සෙවැණැල්ලක්ව
                                        අර්ථයක් තිබේවිද..?

Tuesday 8 June 2010

අතුරුදන්වීම


    
                                      මේ පුංචි කුටිය තුල
                                      නිහඞතාවය අතර
                                      සුවිසල්ව සිටින 'මම'
                                      දෘෂ්‍යමානය මටම...

                                      දෙනෝදාහක් සරන
                                      නගරයේ වීදිතුල
                                      සිහිනයක් වෙමි 'මමම'
                                      අවදියෙන් සිට දකින...

                                      අසංඛ්‍ය තාරකා
                                      අසල මහ සක්වලේ
                                      ශුන්‍යයකි 'මම' මටම
                                      සොයාගන්නද කෙලෙස...

Saturday 5 June 2010

බබ්බුන්ගේ ඒකාබද්ධ ප්‍රකාශනය



ඇති අය විසිකරන
කසල ගොඩකට
විටෙක අපි කසල වෙමු..

චෞර අත් මත විටෙක
සොරබඩුය අප..

වැඩිහිටියෝ නිතින්
අපද විකුණා දමයි
ඔවුන්ද විකිණී සිටින
වෙළඳපොළ තුළම..

ඇත්තටම
අපි ඉපදුණේ ඇයි..?

Friday 4 June 2010

විරූපී යුවතියට....



පද වැලක් සුන'රුත්
නීරස තනුවකට අමුණා
අසාධු දෙවිකෙනෙක් යම්
තැනූ ගීයකි....
ළඳුනි නුඹ නොගැයුණු
අමතකව ගිය ගයන්නට
වසත් කල කොවුලන්ට...

Wednesday 2 June 2010

සිහිනවලට එද්දි..............



                                           නොදනීද ඔබ
                                           සිහිනෙකට එන හැටි
                                           අනුන්ගෙ නිදි ලොවක
                                           විනීතව
                                           සංවරව

                                           හා.... කමක් නෑ..
                                           ආයෙමත්  සූදානම්
                                           මම නිදන්නට
                                           එනවනම් මේ වරත්
                                           ආවාට කමක් නෑ
                                           ඔය නොසන්සුන්
                                           ඇස් ටිකක් නිවාගෙන
                                           විනීතව 
                                           සංවරව......

Tuesday 1 June 2010

අග්‍ර ඵලය.....



                                        සුවහසක් දනන්ගේ
                                        පිළිගැනීමෙන් බුහුමනින්
                                        අභිෂේක ලබද්දී....

                                        පතළ මහ කිතුගොස
                                        රළ නගා'විත්
                                        පැවසීය මට රහසින්
                                        'මෝඩයන් අතර නුඹ'
                                        අග්‍රම ඵලය වන බව.