Thursday 29 December 2011

ජාතික චින්තකයෙක්ගෙන්...




ඉවරයක්ම නෑ‍ මේ වැඩ
හෙට තියෙනව දේශනයක්
ජාතික චින්තනය” නමින්
කතාව යන්තමි හැදුවා
දැන් වෙලාව රෑ දොළහයිනෙ

රට බෙදන්න දෙන්න බැරිය
හමුදාවට කොල්ලො ඕනි
අපේ ළමයි ඉගෙන ගන්න
හරි හපන්නු ගොන්නු නෙවෙයි
උන් තැනකට යන්න ඕනි
යුද්ධෙට යන්නට බැරියැයි
ඔය ගම්වල බයියලාට

ඒක නිසා දේශණයට
ලොකු වගකීමක් තියෙනව
ජාත්‍යාල හිත් ඔක්කොම
කීරි ගැහිල යන්න ඕනි
එතකොට එයි ගම් බයියෝ
හිටු කියල රොත්ත පිටින්

අනිද්දාට තව එකක්ය
දේශීයත්වය අගයමු
ලේසි නෑනෙ ඒක වුණත්
ගොවියන්, වෙද්දුන් ඔක්කොම
මුරුංග ගස් නග්ගන එක
හිතල මතල දෙන්න ඕනි
ඇ‍‍ඩෙන පහේ දේශණයක්
එහෙම වුණොත් ගම්බයියන්
ප්‍රශ්ණ නගන්නේ නැහැමයි

එහෙම බැරිවුණොත් ඉවරයි
ගම් ගොබිලන් විමසනු ඇත
ලොකු කොල්ලා වෙදෙක් නොකර
දොස්තරයෙක් කලේ මොකද?
පොඩි කොල්ලාවත් කුඹුරට
එවන්න තිබුණා නොවේද
එංගලන්තෙ යැව්වෙ මොකද?

කොහොම වුණත් අවුලක් නෑ
ගම් බයියන් නොවන නමුත්
මා කියන දේ අදහන
මගේ ජීවිතේ නොපෙනෙන
ඉගෙන ගත්ත ගෝල බාල
පිරිවර ගෙනයයි මගෙ නම
විද්වත් මහ සභා වලට

ඉන්න ඕනි අන්න එහෙම
අනුගාමිකයෝ කොතැනත්
මා කියනා දේ අදහන
මගේ දෙබිඩි ලොව නොපෙනෙන

ඇයි ඩාර්ලින් මේ මහ රෑ

පොඩි දූගෙන් කෝල් එකක්
කැනඩාවට අයිස් වැටිල
හරිම ශීතලයි කියන්නෙ

ඔව්ව ඔහොම තමයි අනේ
මෙහෙ ඉඳලා වැඩක් නෑනෙ
ලෝකෙ එක්ක ගැටෙන්නනම්
ඉගෙන ගන්න වෙනව එහෙදි
මෙහෙ ආවම තැනක් ගන්න

කතා කරන්නට වෙලාව
දැන් නෑ මට ඔයා යන්න
මට හිතෙනව පමා නොකර
විනාශකාරී බටහිර
චින්තනයේ ආදීනව
නිබන්ධනය අද රෑවත්
අහවර කරලා දාන්න..

යනකොට ඔය ඒසී එක
ඕෆ් කරල දාල යන්න
ගුඩ් නයිට් ඩියර්
එහෙනම් දැන් ඔයා ගිහින්
නිදාගන්න මම එන්නම්..



Saturday 24 December 2011

මුහුණු දෙකේ ආදරයක්....





ඇගේ සිහින් අත මගේ අත ව‍ටා එතේ. සියුම් පහසක්ද, ආශාවක්ද ක්ෂණයකින් විදුලියක් මෙන් හිස කරා ඇදී යයි. මා ගැස්සී යමි. ඒ සමගින් හෙණයක් ගැසූ සේ බියකින් නැවතත් හිස කම්පනය වේ.

දැඩිව මගේ අතේ එල්ලී සිටින ඇගේ ඇතුල් හදවත මා දකිමි. ඒ දැඩි බව මා පලා යා යැයි සැකයක් පිළිසිඳුණු ඇගේ හදවතේ මතුපිට ප්‍රකාශණයයි. ක්ෂණයක ප්‍රීතියක් ජනිත කල ඒ පහසම ඇගේ හදවතේ ප්‍රකාශණයන් දැනෙද්දී මාව බිය ගන්වනු ලැබේ. ඒ අත මා වෙලූ යකඩ දම්වැලක් යැයි මට සිතේ. ගැලවිය නොහැකි සංසාර බන්ධනයක යදමක් ඇගේ වම් අත ලෙසට විකසනය වී මා සොයාවිත් ඇත. ඉතින් මේ හිස පෙලන බිය සාධාරණය.

මේ ඊයේ වනතුරු ඇගේ සිහින් අතගෙන ඇවිද යන අයුරු මම සිතින් වින්දනය කළෙමි. සැබෑවක් නොවන ඒ සිහින සක්මන ප්‍රිය උපදවන සියුම් වින්දනයකින් මා මනස පුරවා දමා තිබිණි. 

මොකද ඔයා හොල්මනක් දැකල වගේ

මා තිගැස්සී සිනාසෙමි.

නෑ මං ඔයා දිහා බැලුවෙ නෑ

ඇය මා කොනිත්තයි. යදම් සිරවුණු තැනක ඇතිවූ රිදීමක් මගේ හිස කරා දිවයයි.

ඈ දැඩිව අල්ලා සිටින මගේ අත පද්දයි. මගේ හිස තුළ යදම් සෙලවෙන නාදයක්  පිළිරැව් දේ. ඒ හඞ මා විපිලසර කරවයි.

දැඩි හිරු රැසින් ගිනියම් වූ පරිසරය සිරුර උණුසුම් කර ඇත. දහඩිය බිඳු හිස වටින් බේරේ. ඇගේ මෙන්ම මගේ අත්ද තෙතබරිත දහඩියෙන් එකට ඇලී ඇත. චලනයක් පාසා ඇලවෙමින් ගැලවෙමින් අපේ දෙඅත් තබන්නට ඒ ගිනියම් දහඩිය කටයුතු කර ඇත. ඒ ඇලෙන ගැලවෙන දහඩිය රුධිරය ලෙසින් විටෙක මට දැනේ.

අප දැන් බෝ මඵවේය. මේ පෝදා පට්ට දහවලයි. මෙතැන මල් පූජා කිරීමේ හා හඳුන්කූරු දැල්වීමේ තරඟයක් පැවැත්වේදැයි මා පුදුමයෙන් බලමි. පෝලිමේ ගොස් අප මල් කිහිපයක් මල් අසුන මත තැබීමට සමත් වූ අතර අධික රස්නය සහිත හඳුන්කූරු රඳවන තුළ අත පුච්චා නොගෙන හඳුන්කූරු කිහිපයක් ගැසීමටද අපි සමත් වීමු.

යමු පහන් පත්තු කරන්න
මේ පට්ට දවල් මොකටද පහන් පත්තු කරන්නෙ

මම ගෙලවටේ ගලන දහඩිය වම් අතින් පිස දමමි.

දවල් කියල නෑ පත්තු කරනව
ආලෝකය පූජා කරන්න ඕනි රෑටනෙ ඉතින්
නෑ මේ ප්‍රඥා ප්‍රදීපය තමන් තුළ දැල්වෙන්න කරන ප්‍රාර්ථනයක් කියල හිතන්න

මා නැවතත් තිගැස්සෙමි.  දැල්වෙන ප්‍රඥාවද සැරින් සැරේ මා තිගස්සවමින් මගේ හිස තුළ බිය ඇති කරමින්  සිටින්නේ, මා කල්පනා කරමි.

අම්මෝ ප්‍රඥාව අපි තුළ පහළ වුණොත් අපි දෙන්න අපිටම හොයාගන්න බැරිවෙයි මා පවසමි.

ඇය මෙතෙක් මල්, හඳුන්කූරු තරඟ සඳහා සහභාගි වීමට අතහැරැ සිටි මගේ අත නැවතත් තරයේ අල්වා ගනියි.
මගේ ළය තුළ ඇය ගැන අනුකම්පාවක්, දයාවක් ජනිත වී මගේ පපුව ඇතුළත සීතල වී යනු දැනේ. ඒ හැඟීම ඇස් වල ඇතුල් කුහරයකට තෙතක් ගලා ඒමට සලස්වනු මට හොදින් දැනේ.

සිතුවිලි තුළ සිහින සක්මන සහ යතාර්ථයේ එක්ව කරන සක්මන එකිනෙකට වෙනස් හැඟීම් මා තුළ ජනිත කරමින් සිටියි. සිතුවිලි තුළදී ළංවීමත්, සැබෑව තුළ පලා යාමත් අපේක්ෂා කරන හැඟීම් පිළිබිඹු කරන මුහුණු දෙකක් සහිතව මා ඉපදී සිටින බව මා දැන් පසක් කරගෙන සිටිමි.

ඒත් ලෝකයා දකින්නේ ඒ මුහුණු දෙකම එකක් ලෙසිනි. එනිසා මා තවම ආරක්ෂිතය.

නැවතත් ඇය ම‍ගේ අතින් ඇදගෙන යයි. මගේ දකුණු අත සිරකර දැමූ දම්වැලක කෙළවරින් කිසිවෙකු මා ඇදගෙන යනු මට දැනේ.

ගිනි කාෂ්ඨ අව්වෙන් රත්වුණු වැලි මතට සුළඟින් නිවී වැටුණු පහන් වල  උණු පොල්තෙල් සැලී ගොස් පය තබන විට යටිපතුල් දැවේ. ඉහළින් දැඩි හිරු රැසින් හිස පිච්චෙන ලෙස දැනේ. ඒ අතරින් අප දෙදෙන පහන් වැලවල් අතර ඇඟිලි තුඩු වලින් වේගයෙන් ඇවිදිමින් ප්‍රඥාව දල්වන්නට තැනක් සොයමින් සිටිමු.

                                 xxxxxxxxxxxxxxx

දැන් රාත්‍රියයි. නැවතත් මම සිතුවිලි තුළ ඇගේ ප්‍රිය පහස ආශ්වාදනය කරමින් සිටිමි.


Tuesday 20 December 2011

ලේ හැලූ මෝඩයිනි..




ලේ දහඩිය හෙලා
විජය ධජ නගන්නට
විජිතපුරයට කුමට
ආවාද නුඹ
දුටුගැමුණු..

එළාර,
මුග්ධය නුඹ
කුමට බිළි දුන්නාද
හිස සමග
නුඹේ සහපිරිවර..

ෆේස් බුකියට ඇවිත්
ගෲපයක් හදාගෙන
දහඩිය, රුහිරු නොසලා
යුද වදින්නට තිබුණා
මහත්වරු මෙන් තොපට..


Saturday 17 December 2011

විකටයා මම තවම..




සිත් සතන් වෙලාගත්
අඳුරු අහුමුඵ සොයන
සොයා ප්‍රමුදිත කරන
විකටයා මම..

පාන බහුරූ කෝලම්
දැක තොසින් ගොසිනි දන
කුමට රැ‍ඳෙනුද මා ළඟ
මතකය රැගෙන යනු මිස..

හැර දමා යන දන
නොදකින නමුදු කිසිකල
විකටයෙක් වේනම් තව
දකියි විනිවිද මසිත..

විශ්වයේ මහ අඳුර
ලැගුම් ගත් හදවතෙහි
මහ විසල් දොර හරින
පුංචි යතුරක් රැගෙන
විකටයෙක් ඒදැයි බලන

විකටයා මම තවම..



Thursday 15 December 2011

භාවනාවට උපදෙස්




බොරු ගොඩක සැඟවුණ
ඇත්ත සොයාගෙන
හෙළි කරනු මැන..

එවිට,

නැවත නැවතත්
මරණය මෙනෙහි වන
මරණානුස්සති භාවනාව
පැමිණෙනු නියතයි
ඉක්මණින්
ඔබ වෙත..


Tuesday 6 December 2011

පවුලක් තුළට ඇද වැටුණු ආදරය





එකල ඇය වඩාත් කැමැති වූයේ මගේ කාමරයේ ඇති ඇඳටයි. මා දවසේ මෙහෙවර හමාර කර පැමිණ ඇ‍ඳෙහි හාන්සි වී සිටින සවස් යාමයන් වල ශබ්දයක් නොනගාම පැමිණ අඩවල් කර ඇති දොර මෑත් කර පැමිණෙන ඇය දෑස් පියාගෙන කල්පනාවේ සිටින මා සිරුර මතට පැන සිනාසෙමින් දඟලයි. එවිට මා ඇය තුරුඵ කර ගන්නෙමි. ඇගේ තොරතෝංචියක් නැති සිනහවටත් කතාවන්ටත් සොඳුරු හිරිහැර වලටත් එතෙක් පටන් මා මුහුණ දෙන්නට පුරුදු වී සිටියෙමි.

මා එනිවසෙහි කුළී නිවසියෙකු වුවද ඒ වන විටත් දෙහැවිරිදි වියේ පසුවූ ඇයට මා සිය පවුලෙන් වෙනස් වන්නේ කෙසේදැයි අවබෝධයක් නොතිබිණ. ඇයගේ ආච්චිඅම්මා සහ සීයා ඇයට අවශ්‍ය පරිදි නිවසෙහි කුතුහලය දනවන කිසිවක් අවුස්සා බැලීමට ඉඩ නොදෙන බැවින් ඈ ඇගේ අභයභූමිය සකසා ගෙන තිබුණේ මගේ කාමරය තුළයි. ඒ තුළ ඇයට රිසිවූ දෙයක් රිසි ලෙස අතපත ගෑමට වගේම අවුස්සා අවුල් ජාලයක් කිරීමට මා ඉඩ දී තිබිණ. එසේම ඇය විසින් නගන ගැලවීමක් නැති ප්‍රශ්ණ වලට බොරු උත්තර හෝ සැපයීම මගේ යුතුකම බව මා පසක් කරගෙන සිටියෙමි.

ඇය එතෙක්ද නොඉඳුල් මලක් වූයේ ඈට තමන්ගේ යැයි ගැනෙන කිසිවක් නොදැණුන බැවිනි. ඇයට මා පිටස්තරයෙකු නොවේ. ඇගේම කොටසකි. වැඩිහිටියන් මෙන් ඇය තවම මමත්වයෙන් පිරී ගොස් නැත. කොන්දේසි විරහිතව ඇයගේ මාමා බවට මා පත්වී සිටි අතර ඒ අතර කිසිදු සිදුරක් නොතිබෙන කලෙහි වැඩිහිටියන් ඇය තවත් එක් මම කෙනෙක් බවට පත් කරන්නට වෙහෙසෙනයුරු මා දකිමින් සිටියෙමි.

සීය තමයි බබාගෙ අම්මගෙ තාත්ත. ආච්චි අම්ම තමයි බබාගෙ  අම්මගෙ අම්ම.

ඇගේ ආච්චි අම්මා ඇයට මමත්වයේ සීමා මායිම් සලකුණු කරනු මට ඇසේ.

එතකොට කාමලේ ඉන්න මාම මගේ කවුද ආච්චි අම්මේ

ආ ඒ නුවන් මාමනෙ. බබාගෙ මාම තමයි තුෂාර මාම. බබාට තෑගි ගොඩාක් අරන් රට ඉඳළ එයා එනවනෙ ළඟදි.

ආච්චි අම්මේ නුවන් මාම මගේ

නෑ බබාගෙ මාම ඉන්නෙ රටනෙ. නුවන් මාම වෙනයි

ඇගේ නොඉඳුල් බව ටිකෙන් ටික ඉඳුල් වීම ඇරැඹෙන කාලයයි මේ.

නුවන් මාමේ.. ම‍ගේ තුෂාල මාම රට ඉඳන් එනවනෙ. මට සෙල්ලම් බඩු‍ ගොඩක් එයා ගෙනෙයි නේද

ඇය මගෙන් විමසයි. ඒත් තවමත් ඇයට මගේ යන්න නිවැරැදිව වටහා ගත නොහැකි බැවින් ඇගේ ආච්චි අම්මා ඇයගේ සීමාවන් දැඩිව සලකුණු කර ඇගේ මමත්වයේ පරිධිය ඇයට අවබෝධ කර දීමට අසීමිත වෙහෙසක් ගන්නා අයුරු දකින මට සිනහ පහල වන අවස්ථා තිබිණි.
කොන්දේසි විරහිත ආදරය තුළින් ඇයව කොන්දේසි සහිත ආදරය වෙත තල්ලු කර දැමීමට ආච්චි අම්මා වෙහෙසෙයි. එබැවින් ඈ කිසිදා දැක නැති තුෂාර මාමා ඇගේ යැයි ඇයට තහවුරු කරමින් ආදර සම්බන්ධතාවකයක් ගොඩ නැගීමට ආච්චි අම්මා උත්සාහ ගත්තේය. කොන්දේසිය තුෂාර මාම ඇගේ මාමා වීමයි. ඒ නිසා ස්වභාවයෙන්ම ඔහුට ඇය ආදරය කල යුතු බව ඇයට තහවුරු වෙමින් පැවැතිණ. එතෙක් ඇය පැවැතියේ කොන්දේසි විරහිතව දකින දකින හැම මාමා කෙනෙක්, නැන්දා කෙනෙක්, අයියා කෙනෙක්, අක්කා කෙනෙක්  කෙරෙහිම ආදරයෙන් සහ සුරතලයෙන් බැ‍ඳෙමිනි.

ඒත් අත්දැකීම් බහුල පරිනත ආච්චි අම්මා හය මසක පමණ කාලයක් තුළ ඇගේ සියඵම සීමාවන් නිවැරැදිව සලකුණු කර ඇගේ පූර්ණ පරිධියේ හැම ලක්ෂ්‍යයක්ම කොතැනද යන්න ඇයට අවබෝධ කර දීමට සමත් වෙනු මා දුටිවෙමි.
ඈව ඇය විදියට ගොඩ නංවන හැම සීමා ලක්ෂ්‍යයක්ම ඒ සය මසක පමණ කාලය තුළ මා දුටුවෙමි. මා නිරීක්ෂකයෙකු පමණක් වී සම්බන්ධ වෙන්නෙකු නොවී සිටීම තුළ ඇගේ‍ කොන්දේසි විරහිත පිළිගැනීමේ දෑස කොන්දේසි සහිත පිළිගැනීමක් බවට පරිවර්තනය වනු මා මොහොතින් මොහොත නිරීක්ෂණය කළෙමි.

ඒ සමසක පමණ කාලය තුළ ඒ අනුව ඇය ඇගේ මාමා, සීයා, ආච්චීඅම්මා, අක්කා ලෙස පෙනී සිටින්නන් පෙර පැවැති එකම සමස්තයකින් වෙන්කර ගන්නට අපූරු හැකියාවක් ලද්දේ ඇගේ ආච්චි අම්මාගේ ඥාණ ප්‍රභාවය සහ අප්‍රතිහත ධෛර්යය හේතුවෙනි.
තව පොඩ්ඩෙන් ඇය ලෝකයේ සියල්ලන්ටම එකසේ ආදරයෙන් බැඳී සිටින්නට ඉඩ තිබිණි.
ඒ වන විට ඇයට නිවැරැදිව වචන උච්චාරණය කිරීමේ හැකියාවද ස්වභාව ධර්මය විසින් ලබා දෙමින් තිබිණ.

දිනෙක ඇගේ මාමා දුර බැහැර කොදෙව්වක සිට පැමිණියේය. කළින්ම ආරෝපනය කර තිබූ තමන්ගේ කම සමග ඇය ඇගේ මාමාව පිළි ගනු මා දුටිමි.

දැන් ඉතින් නුවන් මාමගෙ කාමරේට දුවන්න ඕනි නෑ බබාගෙ මාම ඉන්නවනෙ. ආච්චි අම්මා පවසයි.

දින ගණනක් ඇගේ කටහඞ මිස ඇය මගේ කාමරයේ දකින්නට නැති විය.

දැන් මගේ මාම ඇවිල්ල ඉන්නෙ. ඇය අහම්බෙන් දකින මට පවසයි.

ඇගේ පෙර පැවැති කොන්දේසි විරහිත සිනහව, ප්‍රමෝදය, පිළිගැනීම, සුරතලය සහ ආදරය ඒ දෑස් වලින් ටිකෙන් ටික නිවී යනු මම මොහොතින් මොහොත දුටුවෙමි.
ඇය දැන් කලෙක බබා ලෙස ඇයම හඳුන්වා ගත් ඈ තුළ වූ මම හඳුනාගෙන සිටියි. ඒ ව‍ගේම ඇගේ ඒ මමත්වයේ පරිධියට අයිති සියඵ ඥාතීත්වයන් හඳුනා ගනිමින් සිටියි.
ඇයට හඳුනා ගැනීමට ශක්තිය නැති අනෙක් හැම සීමාවක්ම ඇගේ පරිනත ආච්චි අම්මා විසින් තව දුරටත් හඳුනාගන්නට උදව් වෙමින් සිටියි.

ඇය දැන් ඉඳුරාම යම් නිශ්චිත පවුලක සාමාජිකයෙක් බවට පත්වී හමාරය. පවුල්ගතවීම තුළ ඇයට ඇයගේ කේන්ද්‍රය නිශ්චය කර ගැනීමට හැකියාව ලැබෙන හැටි මම දකිමින් සිටියෙමි. ඒ කේන්ද්‍රය වටා ඇය ඇගේ මම ගොඩ නගනු ඇත. ඇය දැන් ඒ කේන්ද්‍රයෙන් සහ පරිධියෙන් පිටත පවතින වෙනත් පවුල් වලට අයත් අය පිට අය ලෙස හඳුනා ගනිමින් සිටියි.

පවුල කියන්නේ කෙබඳු දෙයක්ද? මම කල්පනා කරන්නට වීමි. ඒ තුළ ඇය අනාගතයේ කෙසේ හැසිරෙනු ඇත්ද? ඇය විසල් ‍ලොවක සිට කුඩා ලොවකට අවතීර්ණ වී ඇත. ඉතින් ඒ න්‍යෂ්ඨිගත වීම තුළ ඇය ඇයව හදුනාගෙන ඇත. කළින් ඇය විසල් ලොවක විසිරී සිටියෙන් ඇය යනුවෙන් පවතින කිසිවක් ඇය හඳුනා ගැනීමට අපොහොසත් විය. එවිට ඇය ලෙස පැවැතියේ ජීවයෙන් පිරුණු කොන්දේසි විරහිත බැඳීම, ආදරය, පිළිගැනීම සහ සතුටයි. ඒත් දැන් ඒ සියල්ලද පුංචි පරිධියකින් යුත් පවුලක් තුළට කේන්ද්‍රගත වී ඇත.

ලෝකයේ විනාශකාරීම ඒකකය පවුලයි.

මට එසේ සිතුණ වාර අනන්තය. අතීත ලෝකය තුළ වගේම වර්තමාන ලෝකය තුළද එක පවුලක සුඛ විහරණය වෙනුවෙන් අති මහත් ජනතාවක් පීඩනයට හෝ සූරා කෑමට ලක්වීම සිදුවුන හෝ සිදුවන අයුරු දැකිය හැකි බැවින් මට එ‍සේ සිතුණාද යන්න මා නොදනිමි.
ඇයගේ දෑසේ සිදුවන වෙනස් වීම දකින මට පවුල පිළිබඳ මේ අවබෝධය ගෙන ආවාද යන්න අදත් මා කල්පනා කරමි. ඒත් පවුල කියන මනෝ නිර්මිත ඒකකයක කේන්ද්‍රයක් තුළට ඇය ඇද නොවැටුණේනම් මා සතුටු වන්නට ඉඩ තිබිණ. මන්ද එසේ කලෙක මාද ඇද වැටීම තුළ මා සමස්තයේ පවතින ස්වභාවික ප්‍රමෝදය, පිළිගැනීම, සජීවී බව අහිමි කරගෙන සිටිනා බව මා අවබෝධ කර ගෙන සිටි බැවිනි.
මනුෂ්‍යත්වයේ විවිධ සීමාවන් නොදැනුවත්වම මා තුළ හිඳ මා යම් තැනක සිර කර තිබෙනුද මා එයින් ගැලවිය නොහැකිව බලා සිටිනුද මා තවමත් දකිමි.

ආරම්භයේ නොදැණුනු මනෝ නිර්මිත පවුලක කේන්ද්‍රගත වීම මා බිය ගන්වයි.

කලෙක මා කොතනක හෝ කියවූ සිද්ධියක් මගේ සිහියට නැගිණ. හිට්ලර්ගේ නාසි හමුදාවේ සිටි නරුම අලුගෝසුවා වූ අයික්මාන් හිට්ලර් යටත් වීමත් සමග ආර්ජන්ටිනාවට පැන ගොස් සිටිද්දි ඊශ්‍රායලයේ මොසාඩ් ඔත්තු සේවය ‍විසින් අල්ලා ගනු ලබන්නේ දෙවන ලෝක මහ යුද්ධයෙන් පසු එළැඹි දෙවැනි දශකය තුළයි. දහස් ගණන් මිනිසුන් ගැහැණුන් සේම කුඩා දරුවන් ඇද ගෙන ගොස් පේළියට තබා වෙඩි තැබීමටත්, ගෑස් කාමර වලට දැමීමටත් අයික්මාන් මහත් රුචියක් දැක්වූ බව එහි සඳහන් වී තිබිණි.
කෙසේ වෙතත් ඔහු ග්‍රහණයට ගෙන අත් අඩංගුවට ගැනීමේ ප්‍රධාන කාර්යය සිදුකල යුදෙව්වාට ඔහු පවසනු ලබන්නේ,
මාව මැරුවත් මගේ දරුවන්ට කරදරයක් කරන්න එපා
මම දරුවන්ට ආදරෙයි ලෙසිනි.
පවුලෙන් පසු අප කේන්ද්‍රගත වෙන්නේ ජාතිය තුළද? 
එතකොට දහස් ගණනක් දරුවො මරද්දි ඔය දරුවන්ට තිබෙන ආදරය තිබුණෙ නැද්ද? ප්‍රශ්ණකරු විමසයි.
ඒක මගේ රැකියාව. ඉහළින් එන අණ මම ඉටු කරන්න ඕනි.
එහෙම නොවුණත් ඒ අය යුදෙව්වොනො ඒ අයික්මාන්ගේ මනෝ නිර්මිත ජාතිකත්වයයි.

පවුල කියන්නෙ ලෝකයේ විනාශකාරීම මූලික ඒකකයයි.
මට මේ සිතුවිල්ලෙන් ගැලවිය නොහැක්කේ ඇයි?

සමහර විට ඒ මගේ කාළකණ්නිකම විය හැක.

Sunday 27 November 2011

ශ්‍රී පාදයේ හිමිකම ලබනු පිණිසයි..



සමිඳ කිම
එකම කන්දක
සලකුණු කලේ
ඔබේ ශ්‍රී පාද සලකුණ
අපමණක් කඳු 
තිබියදී දසත..

එකම කන්දක හිමිකම
බෙදා ගන්නද අප කෙලෙස

අපේ මුදු සිත් සැහැසි ‍වේ
ඔබේ සිරිපා පහස
අනෙකෙකු හිමිකමට
නතු වන කලට..

නැවත පැමිණෙන්න
සමිඳුනි ලොවට
ඉන්පසු වඩිනු මැන
මේ බුද්ධ රාජ්‍යයට..?

ලොකු කුඩා වූ සෑම
උස් කඳුමුදුනකම
තබා යනු පිණිස
ඔබේ සිරිපා සලකුණ..


Sunday 13 November 2011

හීන හැදුණු ද්‍රව්‍යයමයි




ජීවිතයද
ආදරයද
ආණ්ඩුද
මම
නිමවී ඇත්තේ
සිහින සෑදී ඇති
ද්‍රව්‍ය වලින්මය..

Monday 7 November 2011

කියවීම සහ නින්ද පිළිබඳ ‍ඓතිහාසික තොරතුරු




 මිනිසා ශිෂ්ඨත්වයට පත්වූ මුල් වකවානු වල වෛද්‍ය විද්‍යාව අද තරම් දියුණු තත්වයක නොපැවතිණි. ඒ නිසා නින්ද නොයෑමට අද මෙන් ඹෞෂධ භාවිතයක් නොතිබුණ බැවින් එකල විසූ බුද්ධිමතුන් විසින් අකුරු ශාස්ත්‍රය නිර්මාණය කළේය. මිනිසාගේ ස්වභාවික නින්දේ නව විප්ලවයක් ඇති වූයේ අකුරු ශාස්ත්‍රය ඇරැඹීමත් සමගය.

ඊට පෙර ස්වභාවික නින්දට පත් වීමට නොහැකි වූ මානවයා අසීමිත දුෂ්කරතාවයන්ට මුහුණ පෑවේය. අද මෙන් දියුණු තාක්ෂණයක්, විද්‍යාවක්, නිර්මාණාත්මක භාවයක් එකල නොමැති වූ බැවින් ඇඳවල්, රබර් මිශ්‍රිත මෙට්ට, මදුරු දැල් හෝ අවම වශයෙන් මදුරු දඟරයක්වත් වෙළඳ පොළ තුළ දක්නට නොලැබිණ. ඒ කෙසේ වෙතත් අකුරු ශාස්ත්‍රය ගොඩනැංවුණ එකල වෙළඳ පොළක් තිබුණා යන්න පිළිගැනීමට ‍ඓතිහාසික සාක්ෂි කිසිවක් නොමැති බව ඉතිහාසඥයෝ පවසයි.
නමුත් එකල අද මෙන් අවදියෙන් ජීවත් වන ජනතාවක් නොවූ බැවින් වැඩි දෙනා හැමදාම නින්දේම පසුවිය. නින්ද නොයෑමේ රෝගයෙන් පීඩා වින්ඳේ ඉතාම සුඵ පිරිසකි. එබැවින් අද මෙන් නොව එකල එසේ සදාතනික නින්දේ පසුවූ මිනිසුන් බොහෝ විට රෝග පීඩාදියෙන්, වන සතුරු උවදුරු වලින්, තමන්ගේ ආහාර කොටස වෙන අය විසින් සොරා ගැනීමෙන්, සතුරු ආක්‍රමණ වලින් මිය ගිය අතර ඔවුන් නින්දේම පසුවූ බැවින් එසේ සිදුවී මිය ගිය බවවත් ඔවුන් නොදැන සිටියේය. එසේම අල්ලපු පැලේ ඉන්න පවුලේ ලට්ට ලොට්ට මං පහරන්නන් පැහැරගෙන ගියද අවට පැලවල් වල නිදා සිටි අය දැන නොසිටියේය. නිදි මරගාතේ එසේ සොරාගෙන යනු දුටුවද නැවතත් ඇස් පියවී ඔවුන් නින්දටම වැටිණි.

එහෙත් එකලද අපේ රටේ මිනිසුන් මෙන් අවදියෙන් විමසිල්ලෙන් ජීවත් වන ඉතාම සුඵතර මිනිසුන් කොටසක් ජිවත් විය. ඔවුන් අවදියෙන් සිටි බැවින් සිදුවන දේවල් දැකීම නිසා නින්ද නොයන රෝගී තත්වයන්ට බඳුන් විය. ඔවුන් විසින් අකුරු ශාස්ත්‍රය නිර්මාණය කර නින්ද නොයෑමේ රෝගයට පිළියමක් වශයෙන් ග්‍රන්ථ සම්පාදනය අරඹූ බවට ‍ඓතිහාසික සාක්ෂි පවතියි.

නින්ද නොයන අවස්ථාවලදී එම ග්‍රන්ථ කියවීම ඇරැඹූ විට ඉබේම ස්වභාවික නින්ද මිනිසා සොයා පැමිණෙන බව ඔවුන් අත්දකින්නට විය. මෙය අත්දුටු ප්‍රතිකර්මයක් බව තහවුරු කර ගැන්මට අවශ්‍යයනම් නින්ද නොපැමිණෙන රාත්‍රි කාලයේ ලෝකයේ පැරැණිම පුස්තක වන වේද ග්‍රන්ථයක් වැනි පොතක් කියවීම අරඹා ප්‍රත්‍යක්ෂයෙන්ම වටහා ගැනී‍මට ඔබට හැකියාව ඇත.

මෙම ස්වභාවික නින්ද ගෙන එන ප්‍රතිකර්මය මා මුළින්ම අවබෝධ කරගත්තේ පාසල් අධ්‍යාපනයට යොමුවූ පසුවයි. නිදා ගැනීමට හිතෙන මහ දවාලක වුව පාසල් විෂයට අදාල පෙළ පොතක් කියවීම අරඹා විනාඩි කිහිපයකින් ස්වභාවික නින්දට පත්වීමේ නිපුණතාවය ලබන්නට මට හැකි විය. මේ වියපත් අවදියේ වුව මා සැපවත් ස්වභාවික නින්දක ආශ්වාදය ලබන්නේ මේ පැරැණි ප්‍රතිකර්ම‍යේ පිහිටෙනි.

කෙසේ වෙතත් එසේ නින්ද නොයන තවත් කොටසක් අතින් වෛද්‍ය විද්‍යාව දියුණු වීම ඇරැඹිණ. ඒ ස්වභාවික ප්‍රතිකර්ම වෙනුවට නින්ද නොයන්නන් වෙනුවෙන් ඹෞෂධීය ප්‍රතිකර්ම සෙවීමේ උත්සාහයක් වශයෙනි. එසේ ඇරැඹුණු වෛද්‍ය ක්ෂේත්‍රය වත්මනෙහි ඉහළ දියුණුවක් ලබා ඇති අතර නින්ද නොයන්නන් වෙනුවෙන් ස්වභාවික ප්‍රතිකර්ම වෙනුවට ‍‍ඹෞෂධ ප්‍රතිකර්ම භාවිතය සමාජය තුළ ස්ථාපිත විය.

එසේ මුල් අවදියේ ඒ අරමුණින් ගොඩ නැගුණු වෛද්‍ය ක්ෂේත්‍රය ප්‍රතිඵල අත් කර ගැනීමත් සමගම ස්වභාවික ප්‍රතිකර්ම හඳුන්වාදුන් බුද්ධිමතුන්ගේ නිර්මාණාත්මක ප්‍රභවයන් වන අකුරු ශාස්ත්‍රය හා ග්‍රන්ථ නිර්මාණය වෙනත් අරමුණු වෙනුවෙන් භාවිතා කිරීමට මිනිසුන් පෙළඹීම නිසා ඒවායේ මූලික හරයන් නැතිවී ගියේය. ඒ අනුව ලිවීම සහ කියවීම මිනිසුන් විසින් වැදගම්මකට නැති දේවල් වෙනුවෙන් භාවිතා කිරීම ආරම්භ විය.
ඒ අනුව කොටසක් ලිවීම රස්සාව කරගත්තේය. තවත් කොටසක් ලිවීම තුළින් තමන්ගේ පාණ්ඩිත්‍ය පොදු ජනයා අතරට ගෙන ගියේය. තවත් කොටසක් ලිවීම තුළින් මිනිසුන්ගේ හැඟීම් ඇවිස්සීමට උත්සාහ ගත්තේය. තව කොටසක් රාජ්‍ය පාලකයන් වෙනුවෙන් ප්‍රශස්ති සම්පාදනයට ලිවීම යොදා ගත්තේය. තව කොටසක් ලිවීම කියවීම උපදින හැම කෙනා මතම බලෙන් පැටවීමට අවශ්‍ය අධ්‍යාපන පරිසරයක් සැකසීය. ඒ අනුව කියවීම සහ ලිවීම තුළ ආරම්භක යුගයේ පැවැති අරමුණ ගිලිහී ගිය අතර, ඒ නිසාම වත්මනෙහි කියවීමට ඇති දේ තුළ ඒ ස්වභාවික නිද්‍රාජනක ස්වභාවය නොමැත. ඒවා කියවා තර්ක විතර්ක ගොඩ නැගීමට, හැඟීම් අවුස්සා ගැනීමට, ස්වයං රැවටීමකට ‍පත්වීමට හෝ ගහමරා ගැනීමටද අද මිනිසුන් හුරු වී ඇත. ඒවා කියවා පිබිදුණු සිතැති සමහර මිනිසුන් නින්ද නොයන බැවින් ‍ඹෞෂධ භාවිතයෙන් නින්දට යෑමට හුරු වී ඇත.

කෙසේ වුවත් අකුරු ශාස්ත්‍රයේ සහ කියවීමේ ස්වභාවික අරුත වටහා ගත් පුද්ගලයින්ට වත්මනෙහි කියවීමට පවතින දෙයක්  තුළින් වුවද ස්වභාවික නින්දේ ආශ්වාදය ලැබිය හැක. මන්ද ඒ අර්ථය හිතේ ඇති පුද්ගලයා වෙත මේ දේවල් කියවීමට ගත් විගසම ස්වභාවිකවම නින්ද පැමිණෙන බැවිනි. කියවීමට ඇති කිසිදු ලේඛණයක් තුළ සැබැවින්ම වෙනත් අරුතක් ගැබ්වී නොමැති බව ඔවුන් මනාව වටහාගෙන සිටිති.

ප.ලි.
‍මෙය කියවීමෙන් හෝ නිදිමතක් දැනුණේනම් ඔබ අර්ථවත් මිනිසෙක් විය හැක.



Sunday 30 October 2011

පව්කාරයාට ගල් ගසන්න..




  
පස් කන්ඩියේ සිදුරකට කොළ පැහැයට හුරු දුඹුරු පැහැයෙන් යුත් පොළඟා රිංගමින් සිටිනු මා දුටිමි. සිතන්නට වෙලාවක් නැත වහා ගල් ගෙඩියක් අතට ගත් මා වේගයෙන් ඌ මතට දමා ගැසුවෙමි. එයින් ශරීරයෙන් අඩක් චප්ප වුණු ‍පොළඟාගේ සිදුර තුළට රිංගූ හිස ආපසු එළියට විත් කාණුවට වැටිණි. ඌ මරණීය වේදනාවෙන් දඟලයි. මගේ මුඵ ඇඟම හිරි වැටී හිත නොසන්සුන් වෙයි. කෙසේ හෝ පටන් ගත් මේ අපුල වැඩය අවසන් කල යුතුය. තවත් ගල් ගෙඩියක් ගෙන පොළඟාගේ හිස මතට දමා ගැසුවේ අප්‍රසන්න රාජකාරියක අවසානය නොකර බැරි කමට කරන විදියේ අපුල සහ වේදනාකාරී නොසන්සුන් මනසකිනි. තව දුරටත් මට එය විඳ දරා ගත නොහැක්කකි.

අවසානයේ මිය ගිය සතා පස් දමා වසා දැමුවේ අවසිහියෙන් මෙනි. මගේ සිතේ පැවැති වේදනාව සහ මා ගැනම වූ ද්වේෂයෙන් පෙළෙන මා අතු පතර වැඩී ගිය පේර ගස් කිහිපයේ සෙවණේ බිම වාඩි වී සිටියේ මා ගැනම ඇතිවූ පිළිකුල මැඩ පැවැත්විය නොහැකිවය.

මා තුළ ක්‍රියාත්මක වූ‍යේ කුමක්ද? මට සිතා ගත නොහැකි විය.  මා මොහොතකට පෙර ම්ලේච්ඡයෙක් මෙන් හැසිරුණේ කෙසේද යන්න මට සිතා ගත නොහැකි විය. එම සතා උගේ පාඩුවේ පස් කන්ඩියේ සිදුරකට රිංගමින් සිටියේය. ඌ කිසිදු හානියක් මා හට නොකරන ලද අතර මා ගැන සැලකිලිමත් නොවූ බවද මට විශ්වාසය. ඒත් එකල කුඩා මා තුළ ජීවත්වූ ජීවියා තුළට සර්පයන් මරා දැමිය යුත්තන් බවට දන්නා කල සිට යෝජනා වී තිබුණේය. ඒ බව එකල කුඩා මගේ මනසට කවුරුන් කවදා කෙසේ එන්නත් කලේද යන්න මට අදටත් මතකයක් නැත. නමුත් ඒ මානසික එන්නත මා තුළ සක්‍රීයව වැඩ කල බව මා පසක් කර ගන්නා විට මරණයක් මා අතින් සිදුවී හමාරය.

එදින සිට දින සති ගණනක් දහවලත් රැය පුරාත් මා ගැන පිළිකුළෙන් සහ නොරිස්සුමෙන් පෙලුණ මගේ ඇස් වලට විටෙක කඳුඵ පිරවිණ. ඒ කඳුඵනම් මා වෙනුවෙන් එතෙක් ආත්මානුකම්පාවෙන් හෙඵ කඳුඵ වලට වඩා වෙනස් වූ තැනකින් ගලා ආ බව මට දැණින. ඒ තුළින් මගේ සිත අසීමිතව රිදවී මා සැහැසි නරුමයෙකු බව මටම ඒත්තු ගැන්වීමෙන් මා සහනයක් ලදිමි. මා නිවැරැදකරුවෙකු කරමින් නැගෙන සිතුවිල්ලකදී පවා මා මටම ද්වේශ කළෙමි.

සර්පයන් විෂකුරුයැයි මරණීය තර්ජන ගෙන එන්නේ යැයි මා තුළ විශ්වාසය තහවුරු කරන්නට මට පෙර මේ පෘථිවි මතුපිටට පැමිණියන් සාර්ථක වීම නිසා මා මගේම වූ අදහසක් නැති මෝඩයෙකු බවට පත්වී සිටි බව මට අවබෝධ වීම තවත් මාවම නුරුස්සන ස්වභාවයක් මා තුළ ඇති කරලීය. ඒත් ඒ විශ්වාසයේ එන්නත මා මනස තුළ සක්‍රීයව පැවති ඒ කාලය තුළ සහ පොළඟා මා අතින් මියයන මොහොත දක්වාම සර්පයන් දුටු තැන මැරිය යුතු යැයි විෂකුරු චේතනාවක සිටියේ මා මිස කිසිදු සර්පයෙක් නොවේ. මේ ලොව කිසිදු සර්පයෙක් මිනිසුන් මරා දැමිය යුතුයි යන චේතනා වලින් නොපෙළෙයි. එවැනි මතවාදයක් හෝ පිළිගැනීමක් සර්පයින් තුළ නොමැති බව මා තුළ අදටත් ඇති විශ්වාසයයි. එහෙත් එදිනෙන් පසු මා තව තවත් වටපිටාව ගැන සහ සර්පයින් ගැන බියෙන් පෙළෙන්නෙක් වීමි. හේතුව මගේ විෂකුරු බව මියගිය සර්පයාගේ ඥාතීන් හඳුනාගෙන මගෙන් පළිගනු ඇතැයි මා සිතූ බැවිනි. ඒත් කිසිදා එය සිදු නොවිණ. ඔවුන් මා තරම් ම්ලේච්ඡ ආකල්පයන්, විශ්වාසයන් සහ මතවාදයන්ගෙන් මනස විකෘති නොවුණු උන් බව අවසානයේ ඒ නිසාම මට තහවුරු විය.

කෙසේ වුවත් ඉන් පසු කිසිදු සර්පයෙකු මැරීමට මට ශක්තියක් නැති විය. ඒත් සර්පයන්‍ විෂකුරු යැයි ගල් ගසා ඔඵව පොඩි කල යුතුයැයි විශ්වාසයේ මිනිසුන් සිටිති. ඒත් සර්පයන් තුළ එවැනි ආකල්පයක් නොමැති බැවින් මිනිසුන් ගහණය වැඩි වෙමින් සර්ප ගහණය අඩු වෙමින් තිබේ. සර්පයන් සම්බන්ධයෙන් පවතින මානව පැසිස්ට්වාදයට එරෙහිව සර්පයන් කිසිදා එකතු වී නොමැත.

ගල් ගැසීම මිනිසා තුළ පවතින සහජ පුරුද්දක් මෙනි. ගෙඩි වලින් පිරුණු ගස් වලටත්, වත්තට පැමිණෙන බල්ලන්ටත්, වඳුරන්ටත් ගල් ගසන මිනිසාම සර්පයෙක් දුටු විට ගල් ගසා මරා දමන්නට පෙළඹෙයි. ඉන්පසු මහත් සමාජ සේවයක් කල ලෙසින් සැනසුම් සුසුමක් හෙළයි. පළමු ගල කිසිදා පවක් නොකළ එකෙක් විසින් ගසන්නැයි ජේසුස් කී අරුත එදා මා නොදැන සිටියෙමි. එසේ වී නම් මට කිසිදා ගලක් ඔසවීමට ශක්තියක් නොලැබෙනු ඇත. මන්ද මා පව් කන්දක් බව එදාද මා දැන සිටි බැවිනි. ඒත් එකල පව්කාරයන් එක්වී එකෙකු පව්කාරයෙකු ලෙස සලකා ගල් ගසා මරා දැමුණු බව ඒ වදනින් තහවුරු වෙයි. අදද ඇතැම් රටවල් වල වැරැදිකරුවන් වන මිනිසුන් ගල් ගසා මරා දැමෙන බව මා අසා තිබේ.

කොහේදෝ රටක සිඟන්නන්ද ගල් ගසා මරා දැමෙන බව මා කොතනකදී අසා හෝ කියවා තිබුණි. සමහර විට සිඟන්නන්ද සර්පයන් මෙන් විෂකුරු බවෙන් යුතු යැයි සැලකෙන සත්ව කොටසක් විය හැක. එවැනි විශ්වාසයක් ඔඵ තුළට එන්නත් නොකෙරුණ යුගයක වාසනාවට මෙන් මා මෙළොවට පැමිණියෙමි. නැතිනම් මගේ ඔඵවද කුඩු වීමට ඕනෑ තරම් අවස්ථා තිබිණි.

මා මිනිසෙකු වීම ගැන මා කිසිදා සෑහීමකට පත් නොවී සිටින්නෙමි. ඒ අතීත සිදුවීම් කිසිවක් සමාජ පිළිගැනීම්, තර්කයන්, සම්මතයන් ලෙස මා නොදන්නා සමයක මා තුළට රිංගූ බීජ වල අස්වැන්නක් ලෙස සැලකීමෙන් මට මාවම නිදොස් කල නොහැකි බැවිනි. සිතා බැලිය හැකි සිතක් තිබියදී එසේ මෝඩයෙකු ලෙස ක්‍රියා කිරීම ගැන කිසිදා මා මට සමාව නොදෙන්න තීරණය කළේ අද ඊයේ නොවේ.

කෙසේ වුවත් මා මාවම මෙන්ම මා ඇස ගැටෙන ගල් ගෙඩිද අද දකින්නේ පිළිකුලෙනි. මට මිනිසෙකු ලෙස මීට වඩා වගකීමක් ඇතිව මගේම නැවුම් දැක්මකින් ලෝකය දකින්නට හැකියාව තිබිණි. ඒ ශඛ්‍යතාව සමග මා උපන්නෙමි. එහෙත් එසවූ ගල්ගෙඩියකින් අවිඥානිකව ජීවිතයක් නසන්නට තරම් මා මෝඩයෙකු වීමි. විෂකුරු බීජ දරාගෙන සිටියෙමි. ඒ අවිඥානික බව ඒ දක්වා කොයි තරම් කාළකණ්නි සිදුවීම් කරා මා මෙහෙයවීද යන්න මා දනිමි. එකල මා කුඩා දරුවෙකු වී යැයි නිදහසට කරුණු සපයා ගන්නා නරුමයෙක් වීමට මට නොහැක.
‍භෞතිකව ගල් නොවූවද ගල් මෙන් විසල් පහරවල් එල්ල කරන මානසික සංසිද්ධින් කොයි තරම් ඇතුළත සිදුවීද? ඇත්තෙන්ම සැම විටම භෞතික නොවුණත් ගලක් අතින් ගත් ම්ලේච්ඡයෙකු මා තුළ අද දක්වාම ජීවත් වී ඇත. මා දමා ගසන්නට බොහෝ ගල් එක් රැස් කරගෙන සිටි ම්ලේච්ඡයෙකු වූයේ, ගල් වලින් දමා ගසන්නට හුරුපුරුදු වූ මිනිසාගේ සහජ නැමියාව නිසා යැයි පවසමින් මට නිදොස් විය නොහැක. එසේ අනුන්ගේ රූකඩයක් වූයේනම් ඒ මගේ නිවටභාවයය.

ඒ ම්ලේච්ඡයා නිදොස් කොට සමාව දීමට මට කිසිදා නොහැක. මා මනුෂ්‍යත්වය සම්බන්ධයෙන් දෙවියන් සමග වූ ගිවිසුම කඩකර සිටින්නෙමි.එබැවින් මා ගල් ගැසීමට නොව ගල් පහර වැද මිය යන්නට පමණක් සුදුස්සෙක්මි.


Thursday 27 October 2011

පළඟැටියන් තෙමන වැස්ස



වැසි වැටෙනා අතීතයක
තෙමී හඞන පළඟැටි හඞ
ඇසෙන විටදි සුව කුටියක
සතුටු වුණා මම අපමණ
පළඟැටියෙක් නොවීම ගැන..

එහෙත් මෙන්න ඇද හැලෙනා
මහ වැස්සේ අද තෙමෙනා
පළඟැටියෙක් වෙලා මමත්
අන්න පෙනේ වැසුණු ගෙවල්
ඇතුළත උණුසුම පවතින..

පළඟැටියන් තෙමී නසින
හාංකවිසියක් නොදන්න
මිනිසුන් නින්දේ ගොරවති
ඒක තමයි සිස්ටම් එක
ජීවත්වන 
ඇස් පියාන
හෙණ ගැහුවත්
ඇස් නෑරෙන..

Wednesday 19 October 2011

දුමින්දලා මොළය පශ්චාත්භාගයේ තියෙන මෝඩයෝද?






දුමින්දට මොළයක් නැති ‍බව පහුගිය දිනවල ඔහුගේ මරණය පතන බොහෝ දෙනා ප්‍රකාශ කලෝය. ඔහු මෝඩයෙක් බවද, හරකෙක් බවද තැන් තැන් වල ලියා තිබුණේ  ඔඵවට වෙඩි වැදිණි නම් දුමින්දගේ මොළයට හානියක් සිදුවිය නොහැකි බව පවසමිනි. දුමින්දට මොළයක් වීනම් එය ඔඵවේ නොවන පශ්චාත්භාගයට අයත් තැනක තිබිය යුතු බවට බොහෝ දෙනාගේ උපකල්පනය විය.

ඒත් දුමින්ද මොළයක් නැති මෝඩයෙක්ද?

මොළයක් නැති එකෙකුට සිල්ලර කඩයකින් පටන් ගෙන දවසකට මිලියනයක් හෝ වියදම් කල හැකි මිනිහෙක් විය නොහැක.

එසේම නීතියක් තියෙනවා යැයි කියන රටක ඔහු මෝඩයෙක් නම් නීතියට ඉහළින් මත්ද්‍රව්‍ය ජාවාරම් හෝ පාතාළ කටයුතු වල ඇතැම් මාධ්‍ය වල කියවෙන පරිදි නිරත විය නොහැක. එසේම නීතියෙන් තහනම් වූ තම පවුලේ ගුවන් විදුලි නාලිකාව දෑත් ශක්තිමත් කිරීමෙන් පමණක් ‍මොහොතකින් ආපසු ලබා ගත නොහැක. එසේනම් එතන මෝඩ වී ඇත්තේ හෝ හාස්‍යයට ලක්වී ඇත්තේ නීතිය මිස දුමින්ද නොවේ.

කුඩු ජාවාරමට සම්බන්ධ බවට පාර්ලිමේන්තුවේ පවා කියවෙද්දී නීතියේ එක ඇඟිල්ලක්වත් ඔහු දෙසට ඔසවන්නට තරම් අබ්බගාත වූ නීතියක් ළඟදි, පොලිස් දෙපාර්තමේන්තුවක් ළඟදි මෝඩ වී ඇත්තේ දුමින්ද නොවේ.

එසේම රැකවලේ යෙදෙන පොලිස් හෝ හමුදා නිළධාරින් ඉදිරිපිටදීම මහ දවල් දාමරික කම්, මැරකම් වල නියලිම මෝඩයෙකුට කල නොහැක. මෝඩයන් සේ ඒ සියල්ල නොදුටූ ලෙස බලා සිටින්නට සිදු වූයේ පොලීසියට හෝ හමුදාවටය.

අවසාන වශයෙන් එක් අතපසු වීමකින් වෙඩියක් වැදුණු පමණින් ඔහු තවම මෝඩයෙක් වී නැත. මිනීමරුවා කියා බහුතරය අත දිගු කරද්දීත් ඉහළ රාජ්‍ය මට්ටමේ ආරක්ෂාව සහ වෛද්‍ය ප්‍රතිකාර ලැබිය හැකි මට්ටමකට ඔහු පැමිණ සිටීනම් ඔහු මෝඩයෙකු නොවේ. ඒත් ඔහුට අත දිගු කල සියල්ලන්ම ඔහු ඉදිරියේ මෝඩයන් වී හමාරය.

භාරත ඝාතනයේදී ඔහු සහ ඔහුගේ සහචරයන් සෘජුවම අවි ඔසවා මැදිහත් වුණ බවට සාක්ෂි ඇතැමුන් ලබා දී තිබෙන තත්වයක් තුළ ඔහුව අත්අඩංගුවට ගෙන පොලිස් භාරයේ ප්‍රතිකාර ලබා දිය යුතු බව ඇතැමෙක් පවසද්දී රජයේ වගකිව යුතු නිළධාරීන් විසින්ම භාරත ඝාතනයට ඔහු සම්බන්ධ බවට තොරතුරු නැතැයි පවසන තත්වයක් තුළ ඔහු කිසිදා මෝඩකමක් කර නැති බව තහවුරුවේ. මෝඩයන් බවට පත් වෙමින් සිටින්නේ ඔහු අත් අඩංගුවට ගැනීම පිළිබඳ සිහින දකින්නන්ය.

‍එසේම යළි සුවපත් වී පැමිණෙන ඔහු නැවතත් තමන් නැවතූ තැනින් කරමින් සිටි සියල්ල හෙට දින අරඹන විට මෝඩයන් වී සිටින්නේ ඔහුද?

රූපවාහිනී නාලිකාවක් සහ දුරකතන සමාගමක අයිතිකරුවෙකු වීනම් මේ රටේ ජනාධිපති වීම තමාට මහ දෙයක් නොවන බව ඇතැම් පුවත් අඩවි වල වාර්තා කල පරිදි දුමින්ද පැවසූවේනම් එය මෝඩ ප්‍රකාශයක් නොවනු ඇත. ඔහුගේ බුද්ධිය විසින් මේ රටේ බහුතර ජනතාවගේ මානසික යථාර්තය තේරුම් ගෙන ඇත. කුළී ලියන්නන්, කුළී විද්වතුන් ඕනෑ තරම් සිටින රටක ඒ දෙක පමණක් තිබේනම් නිල් පාටට, කොළ පාටට හෝ රතු පාටට ගොන්නුන් හැට හැත්තෑ ලක්ෂයක් නිර්මාණය කල හැකි බව මේ ආශ්චර්යමත් දේශයට ඉහළින් ගෙවී ගිය කාලය සාක්ෂි දරයි.

ඔවුන්ට ඉහළින් මැස්සෙක්සෙකුටවත් පියාඹිය නොහැකි ලෙස පරිසරය ගොඩ නැගූ ඔවුන් මහ මොළකාරයන්ය. එවන් දුමින්දලා, මර්වින්ලා හැරුණු විට අපි සියල්ලන්ම මොළයක් නැති මෝඩයන් විය හැක.

මේ පවතින විදිය සියඵම දුමින්දලා වෙනුවෙන්ය. එබැවින් කිසිම දුමින්ද කෙනෙක් මොළයක් නැති මෝඩයෙක් නොවේ. ඒත් එක වරක් හෝ මේ දුමින්දලා වෙනුවෙන්ම නිමවුණ ක්‍රමය හෝ දුමින්දලා නියෝජනය කරන කිසියම් බලමුඵවක් වෙනුවෙන් සිතුවිල්ලකින්, වචනයකින්, කතිරයකින් හෝ දායක වී සිටින්නේනම් අද දුමින්දට මොළයක් නැති මෝඩයෙක් කියන සියල්ලන්ම අන්තම අන්ත මොළයක් නැති මෝඩයන්ය. පරාජය වන්නේද, පීඩිත වන්නේද, අපේක්ෂා භංගත්වයට පත්වෙන්නේද, කෙළවා ගන්නේද ඔවුන් මිස දුමින්දලානම් නොවේ.

එබැවින් පළමුව දුමින්දලාගේ මර්වින්ලාගේ මොළය ඇති තැන ගැන උපකල්පනය කරන සියල්ලන් තමන්ගේ මොළය පවතින්නේ කොතැනද යන්න පිළිබඳවත් සොයා බලන්නේනම් වඩා හොඳය.

Tuesday 11 October 2011

වෘක මරණය පතා..




පිපිරෙන්න හදිස්සිව
රතිඤ්ඤා වැලක් අර
හාවුන්ගෙ තිප්පොලේ..

මධුපෙරා සාදයට
බලන් ඇත මුවරැලක්
නිදි වරන් රෑ පුරා..

ලේ රතැස් වැසී යන
ප්‍රීතියේ පණිවුඩය
ගෙනෙන්නට මග බලන්
කුරුල්ලන් ගුවනතයි..

මෘගයින් පණ පෙවූ
වෘකයා අඩපණයි
වියරුහුණු වෘකයින්
වියරු සුසුමන් හෙලයි..


Thursday 6 October 2011

ධනපති කඳවුරේ පොඩි එකෙක්ගෙන්..




කවුද ඒ සීයල
කොහේදෝ රටක
හිටියයි කියන
උපන්තේකට රැවුල නොකපපු..

අනේ ඒ සීයල
හිටෝපු ගස් වලින් තාමත්
මරා ගනිමින් අර
ගෙඩි කඩන් විකුණයි
ගහක් පැලයක් ඇටයක්
කිසිදාක නොහිටෝපු
මෙන්න මෙහෙ මාමල
රැවුලුත් වවාගෙන...


Sunday 2 October 2011

ගෞරවය කෙළෙසන්නන්ට දඞුවම



උසස් හොරකමේ
ගෞරවය කෙලෙසන
පොඩි ප‍හේ හොරුන්ට
දඞුවම මරණයයි..

Thursday 29 September 2011

සංවර්ධනය එන්න හනිකට බුල්ඩෝසරයක් සමග..




 හන්දිය මැදට වෙන්නට
ටකරන් දෙක තුනක් අටවා
සරම් කෙටියෙන් පමණක්
විළි වසාගත් කැත
බඩ තඩි කොටා විකුණයි
බුලත් විට..

මහපාර පුරාවට
රතුපාට පැල්ලම් මවා ඇත
නොදැමුණු අසික්කිත
විට හපන්නන් එක්ව..

වම්පස පාර අද්දර
මළකඩ කාපු කූඩුවක
කිළිටි හැඳගත් කෙට්ටු
මළ පෙ‍රේත මිනිහෙක්
විකුණයි දවසම
කෑ ගසා ලොතරැයි..

යුග ගණන් පැරැණි
බස් නැවතුම කැඩුණු
අපිරිසිදු හිඟන්නන්ට
පාදඩ ගැටයන්ට
හෙවණ සපයන කැත අර..

කපටි වෙළෙඳුන් එක්ව
කෑ ගසා විකුණන
වේලුණු කුණුවුණු
එළවඵද පළතුරුද
මිළදී ගන්න පොරකන
අව්වට පිච්චුණ
කේඩෑරී වක ගැහුණු
ස්ත්‍රී පුරුෂ පන්චස්කන්ධ
එහෙ මෙහෙ යනෙන
අපුල පොළ භූමිය..

ඉටි කොළ මස්තකෙහි
අරුමෝසම්ද, රෙදිපිළි
අතුරගෙන මොර දෙන
පදික වෙළඳුන් වටේ කැරකෙන
කැත ඇඳුම් හැඳගත්
අමන බයියන්
අවහිර කරත මහමග..

‍මේ කැත නපුර
පලවා හරින්නට
සංවර්ධනය පැමිණෙන්න
බුල්ඩෝසරයක්,
බැකෝවක් සමග
යුහුසුඵව හන්දියට..