එකම ඇස් වල වෙනසක්?

 

                                         යුද්ධයේ ගිනිදැල්
                                         එළියෙන් දකින්නට
                                         හුරු වූ දෑස්
                                         සාමයේ අඳුර තුළ
                                         කිසිවක්ම නොදකියි..

ගරු බුහුමන් නුඹට උරුම.

දියණියනි, මා ළබැඳි නුඹ
ගගනත සොඳුරු තරුවකි
දෑ රඟමිණකි පොළොවත
විකසිත මලක සුවඳකි..

දිව්‍යමය සොම්නස
ගලන තුඟු සිරසක
නැවුම් වූ උල්පතකි
හිසනමා ගරු කරමි
නුඹ තුළ ඒ
පියවි සොම්නසට..

නුඹ සිටින ඉසව්වෙන්
බෝ දුර පැමිණ අද
පියවි සොම්නස ලෙස
කුණු කඳු හිස දරණ මට
ගරු නොකරන්න
දියණියනි,
පියෙකු වූ පමණින..

ලෝකය සහ මම

                                             ලෝකය
                                             ජනගහනයෙන් 
                                             ඉතිරී පැතිර
                                             විනාශය වෙත
                                             යුහුසුඵ ගමනකය..

                                            

                                             මම

                                             මගේ නිවසක්
                                             මගේ පවුලක්
                                             මගේ දරුවන්
                                             දකින සිහිනෙකය..

වෙනසක් නැති මං?

                                අනෙකුන්ගෙන් වෙනස්වීමට
                                සිතූ සිතුවිල්ලෙන් පමණක්
                                මනඃකල්පිතව මම
                                වෙනස්විමි හැමදාම..


                                එහෙත් ක්‍රියාකාරකම් තුළ
                                ඇතුල් ගැඹුරේ හැමදාම
                                අනෙකුන් සේම විමි..
 

එක වහලක් යට (නො)වෙමු අපි..

                                එක විසල් වහලක්
                                වෙලා අද අහසම
                                අප සැමට ඉහළින..

                                බොහොම කලෙකින් අප
                                එකම වහලක් යට..
                                එහෙත් තව බොහෝ අය
                                වෙන වෙනම වූ
                                වහලවල් යට වෙත..

පියාසර රහස..

ගොඩක් බර හදවත් නිසා
අහසට නැග ඉගිලෙන්න
බැරි අපි තවම පොළොවේය..

සැහැල්ලු පියාපත් ලැබ
සැහැල්ලු හදවත් ඇති
කුරුල්ලෝ ගුවනේය...